Bu araşdırmanın məqsədi istehlakçıların istifadə etdikləri markalar haqqında biliklərini ölçmək və eyni kateqoriyada ən çox istifadə edilən markaları və həmin markaları istifadə etmə səbəblərini ortaya çıxarmaqdır. Digər tərəfdən ilk ağla gələn markalarla və istifadə olunan markalar arasında fərqin olub-olmadığını müəyyənləşdirmək qarşıya məqsəd kimi qoyulmuşdur. Markanı daha geniş istehlakçı kütləsinə tanıtmaq, şirkət sahiblərinə markanın tanınması və istifadəsi barədə məlumat vermək baxımından bu araşdırmanın həyata keçirilməsi çox əhəmiyyətlidir. Çünki, marka istehlakçı qavrayışında özünə yer etməsi baxımından böyük əhəmiyyətə malikdir və mütləq şəkildə bu amil nəzərə alınmalıdır. Bu prizmadan baxıldığında, istehlakçı qavrayışında markanın necə yerləşdiyini və hər hansı bir marka haqqında söhbət getdiyində bu markaya istehlakçının münasibəti və onun haqqında nə düşündüyünü bilmək, marka sahiblərinə marka ilə bağlı nələr edə biləcəyinə dair mühüm məlumatlar verəcəkdir. Bu araşdırma nəticəsində ilin “ən dəyərli markaları”, “ən çox üstünlük verilən markaları”, “ən böyük şirkətləri” ilə tanış ola bilərsiniz. Sorğular Bakı şəhəri də daxil olmaqla Azərbaycanı təmsil edən 8 iqtisadi rayonda 1270 respondentlə həyata  keçirilib.